flux #8 - Dieu n'est-il pas luxembourgeois ?

By Lëtzebuerger Journal Switch to German for original article

Wien decidéiert mat, wa Lëtzebuerg sech nei erfënnt? D'Episod 2 vun der zweeter Staffel vu flux thematiséiert d'Bankgeheimnis, de legale Kader ronderëm d'Fongen an den 80er - an d'Fraen, déi mat um Dësch souzen, wéi déi grouss Entscheedunge getraff gi sinn.

Wat kënnt iech an de Kapp, wann der u Lëtzebuerg denkt?

Héchstwarscheinlech: Steierparadäis. Héich Immobiliepräisser. Oder och nach Banken.

Mee wou kënnt de Wuelstand vun eisem Land eigentlech hir? Där Fro sinn d'Journalist*inne vum Lëtzebuerger Journal am Podcast flux op d'Spuer gaang.

Vun der Stolindustrie als wirtschaftlecht Fundament, iwwer d'Entstoe vun der Finanzplaz, bis hin zu engem ëmmer méi diversifizéierte Wirtschaftsmodell, an deem Tech, Weltraum oder Logistik eng wuessend Roll spillen.

  • Véronique Poujol

  • Marie-Jeanne Chèvremont

  • Jean-Claude Juncker

  • Manou Hoss

  • Kik Schneider

  • Luc Frieden

  • Estelle Berthereau

  • Michel Maquil

  • © alfi

    Jean-Marc Goy

D'Sherley De Deurwaerder, d'Camille Frati, d'Melody Hansen an de Pascal Steinwachs schwätze mat deene Mënschen, déi dës Evolutioun matgestalt hunn, a mat deenen, déi se haut nach ëmmer virundreiwen. Zäitzeien, déi d'Entwécklung aus hirer eegener Perspektiv erzielen. Ma och Historiker*innen, Politiker*innen a wirtschaftlech Schlësselfiguren.

#8 Dieu n'est il pas luxembourgeois?

Et ass Mëtt der 80er, an an engem Sëtzungssall strecken sech d'Käpp iwwer engem Gesetzestext zesummen.

Am Raum: Bankepatronat, Notairen, déi bekanntst Affekoten am Land. Vill Erfarung a vill Krawatten.

An dann eng Persoun, déi net an d'Bild passt. Eng jonk Fra, d'Marie-Jeanne Chèvremont, deemools bei Coopers & Lybrand, ass do, well hire Patron keng Zäit huet, all Woch heihinner ze fueren. Dëst Gesetz, un deem si grad matschafft – d'UCITS-Directive – wäert Lëtzebuerg zum Gateway vun Europa fir Investmentfonge maachen.

Eis Spueresich fänkt e Stéck ausserhalb vun dësem Sall un, an zwar beim Berthe Lutgen, Kënschtlerin a Grënnerin vum Mouvement de Libération des Femmes. 2015 moolt si The Deciders – e Bild, dat weist, wéi e Grupp Hären am Kostüm ënnert dem Arc de Triomphe trëppelt. Ganz kleng am Hannergrond sinn zwou Fraen.

Genau dat war d'Realitéit vun der Finanzplaz an den 80er. Wärend d'UCITS-Gesetz Lëtzebuerg zum Fonge-Standuert Nummer eent an Europa mécht, an de Secret bancaire dem Land international Opmierksamkeet bréngt, bleift d'Fro, wien iwwerhaapt am Raum sëtzt, wann sou eppes decidéiert gëtt.

Wat de Secret bancaire ass, wéi d'Banken domat ëmgaange sinn, a wéi vill Jalousie hannert der internationaler Kritik stoung, dat zielen de Kik Schneider, dee laang bei der BGL war, de Luc Frieden, Finanzminister vun 1998 bis 2013, an de Jean-Claude Juncker, deen dee Modell huet misse verteidegen.

Zesumme mam Fongegesetz huet de Secret bancaire dem Land esou vill Wuelstand bruecht, dass een sech am Ausland gefrot huet: "Dieu n'est-il pas luxembourgeois?"– dorunner erënnert sech d'Véronique Poujol, Wirtschafts- a Finanzjournalistin zanter den 80er Joren.

U flux hu matgewierkt :

  • Interviews : Sherley De Deurwaerder, Camille Frati, Melody Hansen, Pascal Steinwachs
  • Konzept : Sherley De Deurwaerder, Maxime Toussaint
  • Produktioun : Maxime Toussaint
  • Animatioun : Sherley De Deurwaerder
  • Fotoen : Lex Kleren, Misch Pautsch